Անձի վերաբերյալ տեղեկությունները, այդ թվում նաև լուսանկարները, հանդիսանում են մասնավոր կյանքի բաղադրիչ, և առանց անձի համաձայնության այդ տվյալների հավաքումը, մշակումը և օգտագործումը արգելվում է օրենքով, և հանդիսանում է անձի մասնավոր կյանքը հարգելու իրավունքի խախտում։

Այն դեպքում, երբ այդ տվյալների օգտագործումը վնաս է հասցնում անձի պատվին և արժանապատվությանը, ապա առկա է կրկնակի խախտում։

Սոցիալական ցանցերում  նման երևույթներն  առավել տարածում ունեն, առավել ևս, երբ տվյալները հրապարակվել են Ձեր կողմից կամովին և գաղտնիության հատուկ ռեժիմով չեն պաշտպանվում։

Այն դեպքում, երբ հայտնաբերել եք, որ Ձեր տվյալներով, ներառյալ Ձեր լուսանկարները,  բացվել են ֆեյսբուքյան կամ այլ սոիալական կայքի էջեր, ապա․

1. Յուրաքանչյուր սոցիալական կայք՝ Facebook.com, Vkontakt.ru, odnoklassniki.ru և այլն, ունեն հատուկ կարգավորումներ, որոնք թույլ են տալիս բողոքներ ուղարկելով՝ արգելափակել կոնկրետ սոցիալական էջի օգտատիրոջ գործողությունները։ Անհրաժեշտ է դիմել տվյալ սոցիալական կայքի ադմինսիտրացիային՝ պահանջելով արգելափակել տվյալ օգտատիրոջ գործողությունները՝ որպես ֆեյք/կեղծ օգտատիրոջ։
2. Անհրաժեշտ է համապատասխան դիմում-բողոք ուղարկել ՀՀ արդարադատության նախարա­րության «Անձնական տվյալների պաշտպանության գործակալություն»՝ խնդրելով հարուցել համապատասխան վարույթ: Դիմում-բողոքին պետք է կցել ֆեյք էջից կատարված բոլոր արտատպումները։
3. Անհրաժեշտ է հաղորդում ներկայացնել իրավապահ մարմիններին՝ խնդրելով նախապատրաստել նյութեր և պարզել, թե ով է առանց Ձեր համաձայնության օգտագործել Ձեր տվյալները։

Պետք է պահպանել ֆեյք/կեղծ էջերի էլեկտրոնային հղումները, արտատպել ֆեյք էջի բոլոր հատվածները տպիչ սարքի միջոցով, որտեղ կերևան նաև Ձեր լուսանկարները կամ անձնական տվյալները, արտատպել նաև տվյալ ֆեյք էջի «ընկերներ» և այլ բաժինների հատվածները։

Հարկ է նշել, որ անձնական տվյալների հավաքման կամ օգտագործման օրենքով սահմանված կարգը խախտելը, եթե տվյալ արարքը չի պարունակում հանցագործության հատկանիշներ, առաջացնում է վարչական պատասխանատվություն, մասնավորապես, տուգանքի նշանակում` 200,000-ից 500,000 դրամի չափով:

Մարդու անձնական տեղեկություններն առանց նրա համաձայնության օգտագործելը կամ լրատվության միջոցներով այդպիսի տեղեկություններ տարածելը կամ հավաքելը կամ պահելը, եթե դրանք նախատեսված չեն օրենքով, պատժվում է տուգանքով՝ 200,000-ից 500,000 դրամի չափով, կամ կալանքով՝ մեկից երկու ամիս ժամկետով:

ՀՀ արդարադատության նախարա­րության «Անձնական տվյալների պաշտպանության գործակալություն» ներկայացվող դիմում-բողոքի ձևը կարող եք ներբեռնել այստեղից։