Տանը պանիր և այլ սննդամթերք եմ պատրաստում։ Ո՞ւմ դիմեմ վաճառելու թույլտվության համար

Սննդի անվտանգություն

Տանը պանիր և այլ սննդամթերք եմ պատրաստում։ Ո՞ւմ դիմեմ վաճառելու թույլտվության համար

Նախ անհրաժեշտ է, որ ունենաք նման գործունեություն ծավալելու համար իրավաբանական ձևակերպում, այսինքն՝ հաշվառվեք որպես Ա/Ձ կամ հիմնադրեք ՍՊԸ։ Ա/Ձ հաշվառվելու համար բավարար է միայն անձնագրով մոտենալ իրավաբանական անձանց պետական ռեգիստր և տեղում կատարել 3000 դրամ վճարում։ ՍՊԸ գրանցելու համար պետք է իրավաբանական անձանց պետական ռեգիստր ներկայացնել նոր գրանցվող ՍՊԸ-ի փաստաթղթերը, որոնց ցանկին, նմուշային ձևերին կարող եք ծանոթանալ այստեղ։ Իրավաբանական անձանց պետական ռեգիստրի մասին ավելի մանրամասն տեղեկություններ կարող եք ստանալ այստեղ։ Հնարավոր է  ՍՊԸ գրանցել նաև էլեկտրոնային կարգով՝ սեղմելով այստեղ։

Իրավաբանական ձևակերպում ստանալուց հետո անհրաժեշտ է նախ որոշել տեսականին, թե ինչ տեսակի պանիրներ կամ այլ սննդամթերք եք պատրաստելու։ Տեսականին որոշելուց հետո անհրաժեշտ է յուրաքանչյուր տեսակից մեկական նմուշ ներկայացնել ՀՀ սննդի անվտանգության պետական տեսչու­թյուն, որպեսզի դրանք անցնեն համապատասխան ստուգում, որից հետո Ձեզ կտրամադրվի համապա­տասխան ստուգման հավաստագիր՝ յուրաքանչյուր տեսակի համար։ Ստուգման կենթարկվեն ինչպես Ձեր կողմից սննդամթերքը պատրաստելու եղանակները և պայմանները, այնպես էլ՝ Ձեր կողմից պատրաստվող սննդամթերքի որակն ու անվտանգությունն առողջության համար։ ՀՀ սննդի անվտանգության պետական տեսչու­թյան վերաբերյալ մանրամասն տեղեկություններ կարող եք ստանալ այստեղ։

Հարկ է նաև նշել, որ ՀՀ կառավարությունը սահմանել է կաթնամթերքի արտադրության համար նվազագույն պահանջներ, որոնց պետք է համապատասխանի արտադրությունն ու պատրաստվող սննդամթերքը, և ՀՀ սննդի անվտանգության պետական տեսչու­թյունը հենց այդ պահանջներով է առաջնորդվում ստուգում իրականացնելիս։ Խորհուրդ է տրվում, որ մինչև ստուգման դիմելը ծանոթանաք սահմանված պահանջներին և դրանց համապատասխանեցնել Ձեր արտադրությունը։ ՀՀ կառավարության որոշմանը կարող եք ծանոթանալ այստեղ։

Համապատասխան ստուգման հավաստագիր ստանալուց հետո Դուք կկարողանաք զբաղվել արտադրու­թյամբ և վաճառքով՝ վճարելով դրանց արդյունքում ստացվող շահույթից օրենքով սահմանված հարկերն ու այլ վճարումները։

Օգտակա՞ր էր արդյոք այս հոդվածը:
Այո15
Ոչ0